Despois de visitar a catedral de Santiago e dende a Praza do Obradoiro, lugar emblemático da cidade, tómase rumbo cara a Fisterra pola desaparecida porta do Peregrino ou porta da Trindade, avanzando polas pequenas rúas compostelás ata chegar á carballeira de San Lourenzo. É neste lugar onde se atopa o primeiro fito sinalizando este camiño cara á “fin do mundo”.

Continúase pola costa do Cano cara ao río Sarela, cruzando a ponte onde aínda se poden divisar as ruínas dun antigo curtidoiro, un dos moitos que bordeaban o río antigamente e marca de identidade da cidade. Unha pista estreita de gran beleza guía o noso camiño e aproxímanos ao alto desde onde se pode volver a vista atrás para divisar de novo a fermosa catedral de Santiago e o perfil da cidade compostelá.

Prosegue o sendeiro polo antigo camiño das leiteiras a Santiago, correctamente sinalizado, ata as Moas de Abaixo, paso previo á entrada no Val de Roxos. Nun primeiro momento o camiño transcorre por asfalto para proseguir por un terreo pedregoso rodeado de eucaliptos ata chegar a Quintáns, dende onde se poden apreciar as vistas a o fermoso val. Continúa ata o concello de Ames pola ponte medieval de Brea ata alto do Vento, inmersos xa no municipio amiense. O Camiño alcanza o núcleo de Augapesada, onde aínda se conserva outra ponte dun só ollo de orixe medieval que cruza o rego dos Pasos e inicia a ascensión ao alto do Mar de Ovellas. Son impresionantes as vistas que dende aquí se teñen do val da Amaía. É neste tramo cando se van podendo divisar interesantes exemplos de arquitectura relixiosa e casas tradicionais á beira do río Tambre que se cruza pola ponte de finais do século XIV en Ponte Maceira. Do outro lado da ponte agarda xa a comarca da Barcala e, dando paso á localidade de Negreira, atópase o pazo de Chancela. Chégase entón á vila de Negreira, de orixe medieval e onde se poden visitar a capela de San Mauro ou o pazo de Cotón.